التعليم ببلاش.

بسم الله الرحمن الرحيم.
ودي بداية كلامنا مع قوانين دولة بوظا ستان...
شوفوا حبايبنا لما قعدوا واترستقوا على الكراسي الهزازة عملوا إيه!!!
أول ما فكروا فيه التعليم..
قالوا: ليه ما يكنش التعليم كله ببلاش؟؟
صقف الشعب وهيص وكانت ليلة ما تحصلش تاني.
لكن حبايبنا ما فكروش على المدى البعيد هيعملوا إيه بكل الخريجين اللي هيخرجوا..
ولا حتى فكروا إيه التخصصات اللي عيزاها البلد
المهم ما أطولش عليكم:
قعدوا يخرجوا كل سنة مئات الآلاف من المؤهلات العليا والمؤهلات الوُطيا وبدأت الدنيا تتملي باللي كل قدراتهم أعمال كتابية.يروحوا فين وييجوا منين؟؟؟؟
بقت الجامعات عملة زي ماسورة المية اللي انفجرت من كل جانب ومخرجة المية يمين وشمال مش عارفين يلموها إزاي؟؟؟!!!
المصالح المحتاجة 4 موظفين إدوها 50 موظف.
طب وبعدين؟؟
قعد كبير حبايبنا مع رجالته وقعدوا يتشاوروا في اللي حصل..
نعمل إيه يا رجالة؟؟؟
-- العمل عمل ربنا يا كبير ..
-- يعني إحنا بإيدنا إيه نعمله لهم تاني؟!! عيزين يتعلموا علمناهم, عيزين يخشوا جامعة دخلناهم. إيه!! نعملهم إيه تاني.
--خلينا يا ريس في الأهم من المسألة دي. وخلي الناس يدبروا أمورهم بنفسهم..
الكبير: يعني رأيكم كدة؟
رد الكل في صوت واحد: أكيد يا كبير..
انتهت القعدة على الفكرة دي.
لكن شوفوا آخر نتايج البوظا:
الحال بقا كرب والبوظا كترت وعمت الفوضى.
ولا تزال ماسورة الخريجين تطفح علينا كل عام مئات الآلاف
من الخريجين: شباب زي الورد كل واحد منهم بيروح القوى العاملة تحطه مكان ما هي عايزة مش مكان ما يناسبه. -حتى ده كلام قديم, عشان القوى العاملة تقريبا قفلوها وهيبيعوها في المزاد حسب آخر تقارير مراسيلينا من بوظا ستان-
ودي صورة من صور البوظا:
البيت تملأه الزغاريد... الناس فرحة مسرورة والصواني الشرباط بتلف على الحبايب.. يا ترى إيه الخبر؟!!
الأم: بركة يا علي يا بني..
الأب: ما شاء الله يا ابني, مجموع يشرف.. ويا ترى يا بني نفسك تخش كلية إيه؟؟
سكت علي لحظات وقال:
أن يابا هأدخل كلية الألسن. عشان نفسي أتعلم الإيطالي وربنا يكرمني ..
الأب: وإشمعنى الإيطالي يا بني؟؟
علي: الفكرة يابا إنه لغة جديدة وسوق السياحة جاي والشغل فيه بيكسب دهب . وأنا كمان بأحب دراسة اللغات.
الأب: ربنا يوفقك يا بني للي فيه مصلحتك.
وتمر السنوات الأربع ويحصل علي على شهادة الألسن...
ومرة تانية ترن الزغاريد في بيت عم سليمان أبو عل وتلف صواني الشرباط على الحبايب والقرايب اللي جايين يهنوا عم سليمان عشان علي ابنه خد الشهادة الكبيرة...
وبعد انتهاء المباركات والتهاني انفرد سليمان بابنه وقال:
أظن يا بني إنك تنزل تدور على شغل بقا.
علي: أكيد يابا من النجمة أروح مكتب العمل وأخلص الأوراق المطلوبة .
ويذهب علي إلى مكتب العمل ويقدم مصوغات تعيينه
الموظف: خلاص يا بني فوت علينا بعد أسبوع.
والأسبوع يجر أسبوع وفي النهاية.
الموظف: اقعد يا بني في بيتكم والجواب في ظرف 10 أيام هيكون عندك.
وبالفعل الجواب ما اتأخرش عن المهلة اللي إداها له الموظف...وعادت الزغاريد ترن مرة ثانية والناس يباركوا وهكذا...
الأب: مالك يا علي وشك اتقلب ليه؟؟ إنتا مش فرحان عشان الوظيفة جاتلك؟!!
علي: لا يابا الفكرة مش كدة خالص... الوظيفة اللي جاتلي يبدو إنها جاتلي بالغلط..
الأب: ليه كفانا الشر؟؟
علي: يابا إنتا عارف الوظيفة جاتلي إيه؟؟
الأب: إيه يا ترى؟؟
علي: جاتلي وظيفة في شركة مطاحن موظف حسابات...
الأب: إيه!!
علي: لازم في في الأمر خطأ غير مقصود.. أنا هأروح أتأكد من الأمر..
ذهب علي في اليوم التالي للموظف المسؤول.
علي يحكي القصة للموظف وكيف إنه ليس مؤهلا لتلك الوظيفة وأنه مؤهل لأعمال لغوية أو صحفية..
الموظف: وأنا أعمل إيه؟؟
إنتم كتير جدا ودي الوظايف الخالية. وبعدين إنتا فاكرني أنا اللي بأوزع الوظايف.
علي: بس يمكن يكون في حد مؤهله تجارة ينفع في الوظيفة دي..
الموظف يرد بكل برود: طب ما تيجي أشوفلك شغلة رئيس مجلس إدارة ولا وزير. احمد ربنا إنك لقيت الوظيفة وامسك فيها بإيدك وسنانك.
ويعقب: عيال آخر زمن. بقا الواحد منهم عايز يشتغل على كيفه!!! نبطل شغل إحنا بقا ونقعد في بيوتنا..
انتهت القصة على قبول علي للوظيفة "محاسب في شركة مطاحن" بدل ما يبقا مترجم ولا صحفي ولا حتى علاقات عامة..
وعلى فكرة.. الحكاية دي واقعية حصلت لواحد أعرفه ..
إيه رأيكم دام عزكم؟؟؟!!!!!!
وؤأظن النهردة كدة كفاية... والمرة الجاية إن شاء الله نكمل بقيت الحكاية.

طال انتظار القدس.

بسم الله الرحمن الرحيم.
ودول يا حبايبي كلمتين تانيين على قد الحال يا رب يعجبوكم.
يا قُدْسُ عِيشي شَمُوخَاً واسلمي أَبَدا...فَالْنَصْرُ لا يَأْت] إلا مَعَ الْصَبْرِ..أَعْلَمْ حَبِيبَةَ قَلْبِي كَمْ تُعانِي وَكَمْ.. يَبْكِي ثَرَاكِ الْحُرُّ مِنْ خُطَا الْقَذِرِ..قَدْ هَبَّ فُرْسَانُكِ الْأَبْطَالُ وَانْتَفَضُوا..وَتَجَهَّزُوا لِلْوَغَى يا قُدْسُ فَانْتَظِري... رَدَّتْ عَلَيَّ بِصَوْتٍ واهِنٍ كَمَدَاً...طَالَ انْتِظارِي لَكُمْ وَتَعِبْتُ مَنْ صَبْري..كُلُّ الَذِي يَأْتيني مِنْكُمُ دَوْمَاَ..قَوْمٌ سِلاحُهُمُ الْبَتَّارُ مِنْ شِعْرِ..خُطَبَاءُ قَوْمِي كَثيرٌ زادَ عَدُّهُمُ..يُصْلُونَ جَيْشَ عِدَاهُمْ مِنْ لَظَى نَثْرِ..زَهَراتُ عُمْرِي يَسْحَقُها كِلابُهُمُ..وَالْأَهْلُ يَرْمُونَني بِالْشِعْرِ وَالْنَثْرِ.. مَتَى سَيَأْتُونَنِي الْفُرْسانُ يا قَوْمِي؟؟في جَوْفِ لَيْلٍ أَمْ ضُحَى ظُهْرِ؟؟إنِّي شَكَوْتُ إِلَى الْرَحْمَنِ أُمَّتَنا..وَاللَهُ خَيْرٌ مُعِزَّاً خَيْرُ مُقْتَدِرِ...
مع تحياتي. elshaer76

رموز في حياتي.

السلام عليكم ورحمة الله وبركاته. النهردة يا سادة يا محترمين.. جي عشان أتكلم معاكم وأحكيلكم ذكرياتي عن ناس كان ليهم أكبر الأثر في حياتي. الناس دول عشت معاهم أيام هي الأساس في حياتي الوقتي. لذلك استحقوا إني أسميهم "رموز في حياتي"كل إنسان من الناس العظيمة دي هتكلم عنه بشكل من التفصيل وأوضح أثره البالغ في حياتي.
وأول إنسان أتكلم عنه في السلسلة دي هي: جدتي أم أبويا. ممكن كتير منكم يستغربوا. لكن الست دي بحق كان ليها أكبر الأثر في تنشئتي وتكوين شخصيتي برغم إنها كانت أمية لا تقرا ولا تكتب. عشان كدة أحب أولا أديكم فكرة عنها عشان تبقوا عندكم القدرة على تقييم اللي هأقوله عنها بعد كدة.جدتي:ترملت وهي في سن أقل من ال30 سنة.. وفاتلها جدي الله يرحمه أبوي كان عيل صغير ابن 4 أو 5 سنوات مش أكتر. ومع إن أهله كانوا ميسورين ماديا إلا أنها رفضت إنها تسيب ابنها الوحيد ليهم وتروح تشوف نفسها. اشتغلت عشان تربي ابنها الوحيد وكانت في الوقت ده أيضا من مرضى القلب.
فضلت الست العظيمة دي عيشة من أجل ابنها الوحيد لحد ما أكمل تعليمه الجامعي وأخد الشهادة الكِبيرِة -عقبال ما تشوفوا ولادكم يا رب- :d
وبرغم إنها كانت أمية لا تقرأ ولا تكتب إلا أنها كانت على جانب من الثقافة ما تلاقيهوش عند كتير من الجامعيين اليومين دول.فبرغم أميتها إلا إنها كانت محلل سياسي ينتمي للمدرسة الفطرية في التحليل السياسي: فكان عندها القدرة إنها تحكيلك: الفيت كونج عملوا إيه في الأمريكان في فيتنام مثلا.. والجيش المصري عمل إيه في حرب الاستنزاف. وغيره وغيره وإسرائيل والفلسطينيين عملوا إيه في بعض, وكانت برضه عندها القدرة على تلخيص نشرة الأخبار لو سألتها عن آخر الأخبار بكل دقة كأنك سمعت النشرة بنفسك. وكانت من المتابعين الجيدين للإذاعة المصرية -أيام كان فيه إذاعة مصرية ذات قيمة- وكان الراديو صديقها الصدوق من الساعة الرابعة فجرا لما تصحا لحد ما تدخل تنام. خلقت الصداقة دي عندها ثقافة دينية عالية لدرجة أنها بقت تعرف أصوات المقرئين ببساطة من مجرد كلمتين تسمعهم. الأغرب من كدة إنها كانت من متابعين برامج زي: قطوف الأدب من كلام العرب.. ولغتنا الجميلة.. :o
يمكن تستغربوا من الكلام ده لكن هي دي ببساطة الست اللي طلعت أبويا في البداية راجل مش "ابن أمه" بالمعنى المعروف. ودي برضه الست اللي بدأت حياتي على إيديها وبدأت أعرف منها كتير جدا من معايير الحياة.. وأظن النهردة كدة كفاية... والحلقة الجاية إن شاء الله نكمل بقيت الحكاية.

حكاية الأسد والثعلب والحمار.

الأسد - كالعادة - ملك الغابة وكان جائعاً

وكان معه الثعلب الذي لا يفارقه في حله وترحاله وكأنه رئيس وزرائه.

قال الأسد : يا ثعلب جيب لي طعاماً وإلا اضطررت لأكلك!!

قال الثعلب: تأكلني لا لا ، الحمار موجود هسه أجرجره لك حتى تأكله.

قال الأسد : طيب ولا تتأخر علية .


ذهب الثعلب في زيارة مكوكية إلى الحمار
قال له: انتبه إن الأسد يبحث عن ملك للغابة فاذهب معي حتى تتقرب منه (بلكي نرهمها)

قال الحمار: هل أنت متأكد يا ثعلب؟

قال الثعلب: نعم


'وأخذ الحمار يفكر بالمنصب الذي ينتظره فرحاً بفرصة عمره

وأخذ يبني شكل وهيئة مملكته وحاشيته من الأحلام الوردية التي حلقت به في فضاء آخر'. طبعا وصل الحمار عند الأسد وقبل أن يتكلم قام الأسد وضربه على رأسه فقطع آذانه،

ففر الحمار على الفور.

وهكذا فشلت خطة السلام الأولى!!

قال الأسد: يا ثعلب جيب لي 'الحمار' وإلا أكلتك ؟


قال الثعلب : سأحضره لك ولكن أرجو أن تقضي عليه بسرعة.

قال الأسد : أنا بانتظارك.

راح الثعلب للحمار مره ثانيه وقال له:

صحيح انت حمار ولا تفتهم، كيف تترك مجلس ملك الغابة وتضيع على نفسك هذا المنصب،


ألا تريد أن تصبح ملكاً؟!.

قال الحمار : العب غيرها يا ثعلب تضحك على وتقول أنه يريد أن ينصبني ملكا، وهو في الواقع يريد ياكلني .

قال الثعلب : يا حمار، هذا غير صحيح هو حقاً يريد أن ينصبك ملكاً ولكن تمهل

ولا تستعجل!!.

قال الحمار : إذن بماذا تفسر ضربته على رأسي، حتى طارت أذناي؟

قال الثعلب : أنت غشيم يا حمار، كيف ستتوج وكيف سيركب التاج على رأسك، كان يجب أن تطير أذناك حتى يركب التاج على رأسك يا حمار!!

قال الحمار : هه أع أع أع صدقت يا ثعلب، سأذهب معك إلى الأسد الطيب الذي يبحث عن السلام!!

رجع الحمار برفقة الثعلب إلى عرين الأسد مره ثانيه.

قال الحمار : أع أع أع يا أسد أنا آسف ، فلقد أسأت الظن بك!!

قال الأسد : بسيطة مصار شي.

قام الأسد من مكانه واقترب من الحمار ثم ضربه مرة ثانيه على مؤخرته فقطع ذيل الحمار، ففر الحمار مرة أخرى.

قال الثعلب : أتعبتني يا أسد!!!

قال الأسد 'متذمراً' :جيب لي الحمار وإلا أكلتك!!

قال الثعلب: حاضر يا ملك الغابة.

وهكذا تكون قد فشلت محاولة السلام الثانية.

رجع الثعلب للحمار وقال : ما مشكلتك يا حمار ؟.

قال الحمار: أنت كذاب وتضحك علي ، فقدت آذاني ثم فقدت ذيلي، وأنت لا زلت تقول
يريد أن ينصبني ملكا، أنت نصاب يا ثعلب!!.

قال الثعلب : يا حمار شغل عقلك، قل لي بالله عليك كيف تجلس على كرسي الملك 'العرش' وذيلك من تحتك ؟

قال الحمار : لم أفكر في هذه ولم تخطر على بالي..!!

قال الثعلب : لهذا ارتأى الأسد ضرورة قطعه.

قال الحمار : أنت صادق يا ثعلب، أرجوك خذني عنده لأعتذر منه وحتى نرتب الأمور


أخذ الثعلب الحمار معه إلى الأسد مرة ثالثة.

قال الحمار: أنا آسف يا أسد، ومستعد لكل الذي تطلبه مني.

قال الأسد : لا تهتم هذه مجرد اختلافات في وجهات النظر.

قام الأسد وافترس الحمار من رقبته والحمار يصيح


'أين أضع التاج...أين أضع التاج..أين أضع التاج'


وعند ذلك لفظ الحمار أنفاسه الأخيرة.

قال الأسد : يا ثعلب خذ اسلخ الحمار وأعطني المخ والرئة والكلى والكبد.

قال الثعلب : طيب

أكل الثعلب المخ ورجع ومعه الرئة والكلى والكبد .

قال الأسد : يا ثعلب أين المخ؟

قال الثعلب : يا ملك الغابة لم أجد له مخاً!!

قال الأسد : كيف ذلك ؟

قال الثعلب : لو كان للحمار مخ لم يرجع لك بعد قطع أذنيه وذيله .

قال الأسد : صدقت يا ثعلب فأنت خير صديق .


وهكذا نجحت خطة السلام الثالثة.
الممثلون
الأسد : اليهود
الثعلب : أمريكا
الحمار: غني عن التعريف فتكم بالعافية... ويا رب نعرف نتقابل تاني. :d

سلامٌ لغزة.

السلام عليكم ورحمة الله وبركاته.بسم الله الرحمن الرحيم.دي يا حبايبي أول قطفة من عنقود الشاعر... كلمتين على قد الحال يا ريت يعجبوكم...مستني رأيكم كلكم:
سَلامٌ لِغَزَّة وأَلْفَيْ سَلامْ..
سَنَأْتي وَمَعْنا مُهَنَّدْ حُسامْ...سَنَقْطَعْ وَنَضْرِبْ رِقابَ اللِئامْ.لِتَحْيَيْ يا غَزَّة عُصورَ الْسَلامْ..سَنَأْتِي نَدُكُّ حُصُونَ الكِلابْ.سَنَأْتي جَحَافِلَ مِنْ كُلِّ باب...سَنَمْلَأْ سَماءَ العِدا بالضَبابْ..سَيَنْسى الأَمانَ ويَنْسَى السلامْ...جَحَافِلُ عِزٍّ وفيها الْأُسُوُدْ..سَنُصْلِيهِمُ مِنْ نيرانِ البارودْ...وَنَمْحُو مِنْ الأَرْضِ ذِكْرَ الْيَهودْ....وَيَعْلُو رِجالُكِ فَوْقَ الأنام...سَنَعْلو وَنَعْلوَ مِثْلَ الْشُمُوسْ...وَنَبْقَى أُباةً رَفيعي الرؤوسْ...وَفَوْقَ عِداكِ سَنَخْطو, نَدوسْ...وَنَحْمي الْحِمَى مِنْ شُرُورِ الْلِئامْ...فَصاحَتْ: إِلامَ الكَلامُ الْجَميل؟؟؟ووَعْدٌ بِنَصْرٍ مَداهُ طَويلْ؟؟وَأَنْهارُ دَمِّ الشَهيدِ تَسيلْ..وَأَنْتُمْ نِيامٌ نِيامٌ نِيامْ؟؟؟لَشِبْلٌ بِأَرْضي بِأَلْفَيْ جَبانْ...جَبانٌ يَهابُ الوَغَى والميدانْ...وَأُسْدِي الصَغِيرَةُ مَلَأُوا المَكانْ...مَلاحِمَ لا يَحْتَويها الكلامْ...فإِمَّا تَهُبُّوا لِنَصْرٍ كَبيرْ...وإِمَّا تَضيعُوا غُثَاءً حَقيرْ..كَلامٌ أَتانيَ مِنْكُمْ كَثيرْ...فَبِئْسَ الخَطيبُ وَبِئْسَ الكَلامْ...شَكَوْتُ إِلَيْكَ إلَهي الجُحُودْ..وَضَعْفَاً وَخِزْيَاً أَمامَ اليَهودْ...وَذُلَّاً لِنُبْرِمَ مَعَهُمْ عُهودْ...يَزيدونَ بَطْشَاً وَنَرْجو سَلامْ!!!لِتَبْعَثْ إِلَهي جُيُوشَ الكِفاحْ... بِعُمَرٍ وَقُطُزَ وأَيْضَاً صَلاحْ..وحَمْزَةْ وَخَالِدْ رِجالَ الفَلاحْ..وأَيْضَاً عَلِيَّ التقِيَّ الإِمامْ..دَعَوْتُكَ رَبِّي وَأَنْتَ الْمُعينْ...شَكَوْتُ فُتُورَاً من الْمُسْلِمينْ...وَضَعْفَاً وَخِزْيَاً مُذِلَّاً مُهينْ...فَأَنْتَ الْمُدَبِّرُ أَمْرَ الْأَنامْ..

من قوانين دولة بوظا ستان.

بسم الله الرحمن الرحيم.في البداية تعالوا نعرف إيه هي دولة بوظا ستان عشان نبقا على نور مع اللي هنقراه من هنا ورايح في البوستات دي:دولة بوظا ستان : مجموعة من المرتزقة وولاد الليل اتلموا على بعض في ظروف غمضة وفجأة فطوا ونطوا وقعدوا على دماغ الناس وكبسوا على مراوحهم... والكلام ده بقاله كتيييير لدرجة إن الناس -يا حول الله- زي ما تقول اتعودوا على كدة لدرجة أنهم مش متخيلين إنهم يرجعوا أحرار مرة ثانية. وولاد الإيه دول لما مسكوا الأمور قلبوا الحال... وشردوا العيال... ونهبوا الأموال... وغيره وغيره من اللي لسة هنشوفه سوى مع دولة بوظا ستان..عموما ربنا يجعل كلامنا خفيف عليهم. واقعدوا بالعافية.

استفتاح.

بسم الله نبدأ..والله يا محترمين أنا جيت هنا عشان أبعبع وأقول كل اللي ييجي في نفسي.. استكفيت: ما ينفعش, عيب ياض, قوانين المنتدى, بابا وماما يزعلوا.... كل ده شبعت منه خلاص.عشان كدة قلت لنفسي: ياض ما تعملك حتة مدونة محندقة على قد حالك تقول فيها كل اللي في نفسك إنشالله تقف تهيس زي المجانين ولا حد يقول لك ما ينفعش ولا قانون ولا أي بطيخ من ده...وكمان حبايبك اللي يجولك يبقا عندهم الحرية إنهم لو عجبهم كلامك يقولوا لك: شاطر يا شاعر أحسنت.. ولو ما عجبهمش كلامك يقولوا لك: إخييييييه!!!وتبقا الحكاية حرية في حرية..يعني أنا هنا لما أكتب ممكن تلاقوا أي حاجة من غير سابق إنذار فما تتخضوش!!!عموما.. حبيت أستفتح المدونة بالبوست ده عشان تبقا كل حاجة على مية بيضة بالصلاتو على النبي.. ياللة!!! فتكم بعافية ونتقابل في البوست الجديد.