لحد إمتى؟؟؟؟؟؟؟؟

وحشتوني.
بالطبع أنا آسف على التأخير.
بس إنتم عارفين الفترة اللي بنمر بيها مليئة بالأحداث,
بس الملفت للنظر إن البوظا لا زالت متوغلة في العقول.
الشعب الغريب اللي كان في بوظا ستان وعانى كثير من الخراب, واعتقدنا إنه تحرر وفاق من البوظا اللي ملأت دماغه.
ونظف نفسه وقرر يفوق,
لكن للأسف لقيناه واخد على الصُطَل !!!
والبوظا أصبحت جزء من تكوين الدم عنده...
لما الشعب يعاني من الشرطة البوظوية مدة 60 سنة, ولما ربنا يصلح حال الشرطة تلاقي الشعب بيتملعن ويعيش بأسلوب ما يرضيش حد,
ويجبر الناس تقول عليه "شعب يخاف ما يختشيش"!!
أيوة فعلا:
شوفوا معايا اللقاء ده وبعدين نكمل:

http://www.youtube.com/watch?v=bOv0uUN6Pns&feature=topvideos_mf

مش بذمتكم الشعب اللي دي سلوكه يبقا شعب يخاف ما يختشيش؟؟؟؟
شعب عاش على البوظا, ومصر يموت فيها!!!!
وعلق يافطة بالآية الكريمة "أخرجوا آل لوط من قريتكم , إنهم أناس يتطهرون"
يعني كل ذنبهم إنهم أناس يتطهرون!!!
وفي حالتنا "أخرجوا الأحرار المتحضرين من بلدكم, إنهم أناس يفهمون" وأستغفر الله العظيم من شبهة تحريف القرآن...
كنا زمان بنشوف المشهد بالعكس,
(الشعب بيشتكي من الشرطة)
أما الآن فالشرطة هي اللي بتشتكي من الشعب,
زمان كان الضابط يضرب مواطن, ويمسح بكرامته الأرض...
الوقت المواطن يضرب الضابط بظهر إيده!!!
بالذمة مش بوظا؟؟؟
إيه رأيكم دام عزكم؟؟؟

إنتَ وهوَّ... عيزين إيه؟؟؟؟!!

السلام عليكم.
أنا زعلان!!!
زعلان جدا من كبراءنا.
مش حاسبين للدنيا حساب..
كل الفكرة نقول ونلعلع...
وإنتي يا مصر تكوني خراب...
آدي أستاذنا .. فقيه دستوري...
وبنعمل له ألف حساب...
شوفوا كلامه وردوا وقولوا..
مش بالذمة دماغه خراب؟؟؟
http://www.youtube.com/watch?v=07zHen7caJY

وآدي الشيخ العالي مقامه
بيلفوا له على الأكعاب...
شوفوا كلام الشيخ الفاضل...
اللي بيسحر في الألباب..
http://www.youtube.com/watch?v=NfmgvfuG5UU

http://www.youtube.com/watch?v=9W2D3BYxqb0

يبقا كلام أستاذنا الفاضل.
ولا كلام الشيخ جذاب؟؟؟؟
إنتَ وهوَّ وغيركم ياما..
عيزين ليه الدنيا خراب؟؟
صمتكو أفضل ويريحنا..
سيبوا الغالية لأحلى شباب...
اللي بيشعل نار الفتنة..
يتفضل برة الأبواب.
مصر الغالية المولى جحاميها..
هو الرحمن الوهاب.
إحنا ولاد الأرض الطاهرة.
وبنرويها بدم شباب..
علشان يطرح ورد بلادي...
ويزين كل الأبواب...
يبقا الشيخ والدكتور يحيى...
وجماعة الجيل المرتاب...
خليكم مصدر للوحدة..
والقوة (يا أولي الألباب)

على الهامش.

السلام عليكم ورحمة الله وبركاته.
يمكن اللي مرينا بيه الفترة اللي فاتت كان أعظم من أ،ي أوصفه أو أتعرض له بأي كلام,
لأننا يا إخوان شفنا حدث ما مر على مصر ولا أي بلد في العالم زيه أ[دا,
مر علينا يوم الدنيا كلها وقفت وصفقت لنا بكلتا يديها.
يوم خلعنا الطاغوت من مكانه,
وبدأ الضرب على أذناب النظام.
والميزة كمان يا حبايبي إن ربنا القدير سخر لنا ناس نثق فيهم فعلا,
ناس هم أحرص ما يكونوا -هكذا قالوا وحن نثق بهم- على مصلحة الشعب ويؤيدون مصالحه,
لكن في وسط الزحمة دي,
وفي وسط التخبط اللانهائي الناتج عن عدم تصديقنا لفكرة أن يكون لدينا (رئيس سابق) أو (رئيس مخلوع) والشخص ده عليه من الشبهات ما يغطي ملامح وجهه.
وقعنا في قلنا وقالوا:
فهما قالوا:
http://dostor.org/opinion/11/february/25/37003


وإحنا قلنا:
يا ناس إحنا فعلا معارضين لوجود شفيق وحكومته, لكل الأسباب اللي قلتوها.
ويمكن لمخاوف كتير جدا من وجود دسائس زي وزير البترول الجديد وعلاقته المعروفة مع شركة شرق المتوسط وما هو معروف عن علاقتها بتصدير الغاز لغسرائيل.
وغير ده كله, إحنا عايزين حكومة تصريف أعمال لا غبار عليها بالمرة, حكومة تحترم الثورة والثوار فعلا.
لكن تعالوا أقول لكم كلمتين على الهامش,
والمعروف إني لا أفقه السياسة إلا كما يفقه الطفل الذي عمر 3 أيام في النظرية النسبية.
إنتم لمحتم عن رؤساء الهيئات والجرائد والشركات والبنوك وخلافه اللي هما أساسا من وضع الطاغية مبارك ونظامه الفاسد الفاشل.
وقلتم ما مؤداه: إن الاستكمرار في التعامل معهم ما هو إلا "ضرب للثورة على قفاها"
وبصراحة أنا لي تحفظ مهم هنا:
لو إحنا طلبنا من القوات المسلحة الوقت عزل كل المجالس الإدارية والرؤساء والمسؤولين الموجودين في المؤسسات العامة والمصالح والهيئات .... إلخ
إذن, إحنا بنطلب هدم كامل للبلد, والهدم ده من رأيي غير مأمون الجانب,
المطلوب الأهم هو بناء الدولة الجديدة سريعا على أسس من الديمقراطية والرغبة في الإصلاح,
بس برضه, إن ضد الإقصاء من أي نوع.
بدلا من أن نطلب إقصاء كل هؤلاء المسؤولين والشخصيات اللي يمكن يكون فيها ناس وطنيين حقيقيين أو خبرات لا تعوض,
ممكن نطالب بمراقبة جيدة,
مراقبة مستقلة عن كل السلطات,
مراقبة قوية.
المراقبة دي يكون من مهامها الضرب الفوري والسريع على يد كل مخالف أو خارج عن القانون,
وتكون العقوبات رادعة ومخيفة لكل من تسول له نفسه العبث بمصالح الناس.
يبقا الأستاذ المهدي في دعواه يهدف إلى هدم البلد,
والأمر لا يمكن أ، تستقيم معه مصر خاصة في ظل غياب الامن والشرطة التضارب الناتج من (الفراغ السياسي) المخيف.
حفظ اللهمصر.

شوفوا غلاسة بابا!!!

السلام عليكم ورحمة الله وبركاته.
النهردة يا حبايب جاي أشهدكم على واحد...
واحد حِشَري!!!!
حاطط مناخيره الكريمة في كل حاجة...
بيتكلم في كل شؤون الناس...
وبيعدل على كل حاجة.
لكنكم يا ناس لو دورتم وراه, هتلاقه خراب, وفضايح, ومهازل ليس لها حصر ولا عد...
مش هأتكلم كتير...
اقرأوا الخبر ده وإنتم تعرفوا قصدي....

http://www.bbc.co.uk/arabic/worldnews/2011/01/110110_pope_blasphemy.shtml

لدرجة إن أفعاله الغريبة دي حركت الحجر,
http://www.bbc.co.uk/arabic/middleeast/2011/01/110111_egypt_vatican_envoy.shtml

عرفته بقا يا جماعة مين بيطفي النار ويررش عليها جاز؟
وفي الآ×ر يعيط ويهيص ويعمل صداع.
ياللة , أهي كلها تخاريف... وربنا يجعل كلامنا خفيف.

كلنا أقباط!!!!!

السلام عليكم جميعا.
يمكن تستغربوا من العنوان:
• كلنا أقباط؟؟ يعني إيه كلنا أقباط؟!
• آه كلنا أقباط...
• إنت يا ابني مش قلت إنك مسلم؟
• آه مسلم.
• أمال إيه حكاية "كلنا أقباط" دي؟!!!
• يا إخوان تأنوا شوية, ÷ي القبطية دي مش ديانة...
• أمال إيه يا فصيح؟
• القبطية دي جنسية...
• ها؟!!!!!
• أيوة صدقوني. وإدوني فرصة أفهمكم.
• قول يا فصيح زمانك.
• هو الرسول الكريم صلوات ربي وسلامه عليه قال إيه في حديثه الشريف اللي وصانا فيه بأهل مصر؟
• قال إيه؟
• قال: ما معناه "استوصوا بأقباط مصر خيرا."
• وده يعني إيه يا فالح؟
• دا يعني إن الرسول عليه الصلاة والسلام وصانا بأهل مصر كلهم خيرا, والوقت ده ما كانش سكان مصر نصارى فقط ولا مسلمين فقط ولا يهود فقط. بالعكس... كان فيهم وثنيين كمان, وبقايا من ديانة الفراعنة, ونصارى ويهود..... وخلافه. وعليه, فالرسول وصانا بأهل مصر عموما. وتعالوا نسأل سؤال مهم جدا, هو نصارى مصر يختلفوا عن نصارى العراق؟ ولا نصارى الشام؟ ولا النصارى الغربيين ولا..... طب إشمعنى نصارى مصر أقباط فقط وما فيش نصراني تاني في الدنيا يطلق عليه اسم قبطي خلاف نصارى مصر؟
• آه والله كلامك معقول.
• يبقا الأصل في الكلام إن القبطية جنسية مش ديانة. ولو نظرنا في الأصول اللغوية لكلمة قبطي. لوجدناها تعود إلى الأصل اليوناني: “eqyptus” وأعتذر لو هجائي لللكلمة اليونانية فيه خطأ. والأصل ده معناه "مصر" ومنه خرجت الكلمة “Coptic” الإنجليزية والتي تعني قبطي. وكل مشتقات الكلمة التي أُعيدت بالقهر على النصارى دون المصريين. مع إن الأصل في الكلمة إنها تعود على الجنسية المصرية, واللغة المصرية والديانات الموجودة في مصر كلها بصرف النظر عن أصل أو دين. ما دام الشخص يعيش في مصر, وأصله مصر فهو قبطي “Coptic” وعليه فنحن يا إخوة " كلنا أقباط"

ولكن الجنسية القبطية دي تخلي من واجبنا كلنا الاشتراك في حماية هذا الوطن. بمعنى: إني أخاف على الأرض دي وعلى كل من هو عايش فوقها وأحميه بروحي. وكمان أمنع أي خطر يتهدد أهل هذا البلد.
يمكن يكون كلامي غامض. لكن تعالوا نتصارح.
العلاقة بين القبطي المسلم والقبطي النصراني علاقة أعقد ما تكون, ويندر وجود مثل هذا التشابك بين علاقة أي فئتين مثلهما في العالم أجمع. يعني, ما ينفعش إنك تفك التشابك بين المسلم القبطي والنصراني القبطي أبدا, مثل اللي حصل في العراق, يعني ما ينفعش إن إحنا نقول: البلد دي ودي ودي يكونوا للأقباط النصارى, ودول للأقباط المسلمين, لأن حدوث ده هيحدث انهيار مدوي في المجتمع المصري.
إزاي نقدر نفصل الجيران والأصحاب والحباي؟؟؟
إزاي نقدر نفك علاقة عمرها 14 قرن؟؟؟!!!
منذ دخول العرب المسلمين لمصر , والأقباط رحبوا غاية الترحيب بهم, وأصبح هناك –زي ما قلت من قبل- أقباط مسلمين, وأقباط آخرين فضلوا نصارى زي ما هم.
وفضلت علاقتهم هي هي كأنهم على دين واحد. يعني الدين ما فرقش بينهم. ولا قسمهم.
ومرت أحداث قاسية جدا, وظروف كبيرة, أكبر من الخيال.
حروب.. وانتصارات, وهزائم, وانكسارات.... وأفراح ... وأطراح.....
كلها ما فرقتش بينهم أبدا, لأنهم نسيج واحد. حتة قماش ملونة, مش ممكن تقدر تفك خيوطها من بعضها.
يبقا لما ييجي حد يفك الخيوط دي لازم يفشل,
لازم يلاقي القماشة (حديد) والإيد في الغإيد.
لأنه لو قدر يفك فتلة واحدة.
صدقوني: القماش هتتهربد.
وساعتها "قول على الدنيا السلام"
وعموما أهم كلمتين.
وسيبتكم بعافية