آل عيزين فلوس!!!!!

بسم الله الرحمن الرحيم.
آسف يا حبايب قلبي على التأخر...

لكن والله أنا اللي حاشني عنكم الشديد القوي..

من أهم الحاجات اللي حاشتني عنكم....
(الخيبة)!!!!

بتقول إيه يا شاعر؟؟؟؟!

زي ما بأقول لكم..

الخيبة...

وإيه هي الخيبة دي يا فصيح؟؟؟!!

الخيبة يا حبايبي هي البدعة المتميزة اللي حصلت لي شخصيا ولكتير من إخوانا الخوجات...

من العاملين في دولة بوظا ستان..

هو إنتا يا شاعر رحت بوظا ستان؟؟؟

آه للأسف انتدبت كخوجة في مدارس دولة بوظا ستان..

وده عرضني للمرور بالخيبة التقيلة اللي هأحكيلكم عليها ...
طب احكي يا سيدنا وما تطولش...
الخيبة دي يا إخواننا هي :

(امتحان الكادر)

وده يبقا إيه يا سيدي؟؟!!

الخوجات في بوظا ستان شعروا أخيرا -ويا ريتهم ما عملوها- إن الماهية مش نفعة لا طبلة ولا تار.. وإن العيال بيموتوا من الجوع مش لقيين العيش الحاف..

صحيوا من النوم وطالبوا بزيادة المرتبات ...

بس هما مين!!!!!

حبايبنا الكبار بتوع البلد هناك ما ينفعش يتضحك عليهم أبدا....
ااتصل كبيرهم بالمسؤول عن التعليم في بوظا ستان والمسؤول عن تسريب الفلوس...
اجتمعوا الثلاثة على جنب في أحد قهاوي العاصمة...
وبعد ما جالهم الشيش والشايات بدأ الكبير بالكلام قائلا:
-- شفت يا عم موظفينك عملين دوشة وعيزين فلوس زيادة!!

-- الخوجات؟!! آه ولاد ال......

الكبير: من غير شتايم.. هنعمل إيه؟؟

-- أحول اللي اتكلموا للتحقيق وأفصلهم يا كبير؟؟

الكبير: لا يا ناصح..
ثم استطرد الكبير سائلا المسؤول عن تسريب الفلوس قائلا:
وإنتا رأيك إيه؟؟

-- أرى يا كبير إن إحنا نعلن عن عجز في ميزان المدفوعات ونعدهم بزيادة مرضية قريبا..

اعتدل الكبير في جلسته وأشعل سيجارته المنتفخة كالعادة ونظر إليهم فيي لا مبالاة وقال:

الكلام الموزون يا بهوات : امتحان....

نظر إليه الرجلان في عجب ثم استطرد بتاع التعليم وقال:

امتحان!!! يعني إيه يا كبيرنا؟؟

الكبير:
امتحان يا ناصح للمدرسين..

-- ها؟!!! وفغر المسؤول فاها وكأنه فقد مفردات الكلام....

أردف الكبير قائلا:
يا سعادة المسؤول المحترم إحنا نعلن عن زيادات مغرية في الأجور....

فقاطعه بتاع الفلوس قائلا:
يا كبير الزيادات هتقلل نصيب كل واحد فينا والفلوس اللي بتسافر برة بانتظام هتنقص قوي..

الكبير: افهم يا.... وسيبني أكمل. ثم استطرد : أنا بأقول نعلن مش نعطي..

-- وبعدين يا كبير؟؟ كمل..

الكبير: بعد شوية نعلن عن إنشاء هيئة لتقييم الخوجات للتأكد من صلاحيتهم للقيام بتعليم أبنائنا.. ثم بعد ذلك نعلن عن تقسيمة للفلوس ونوصلها إن شالله لحد 150%

-- وبعدين؟؟

الكبير: بعدين نقول: الزيادات لا بد أن يسبقها امتحان.. ونفضل نسوف ونغير في المعلن عن الامتحان وقواعده. وأهي فترة نضيع فيها وقت..
وبعدين نحدد موعد للامتحان لكن نسيب السايب في السايب, ولما يمتحنوا ولا كأننا شفنا الامتحان أساسا وننجح على قدر المتوافر من الفلوس في إيدينا, ونخنصر على قدر الإمكان..
واللي مش هيمتحن وتكبر نفسه ويحس بالكسوف من الامتحان مش هيأخذ فلوس ...

نظر الرجلان إلى بعضهما البعض ثم تكلم بتاع التعليم وقال:
حلاوتك يا كبير!!! علي النعمة إنتا آخر مزاج وأحلى دماغ.

بتاع الفلوس:
بالشكل ده يبقا في فرصة كبيرة نسرب أكبر قدر من الفلوس ونشوف حتى الفوايد نبقا نرميها لهم عشان يسكتوا...
ده باختصار شديد يا حبايبي اللي حصل...
أما خبرتي الخاصة مع الامتحان, فخلوها للبوست الجاي.
إيه رأيكم دام عزكم؟؟؟؟؟